వదలకుండా కురుస్తున్న వర్షాల మూలంగా వాతావరణం ఊహించనంతగా మారిపోయింది. చల్లని ఈ వాతావరణంలోవైరస్, బ్యాక్టీరియావంటివి వేగంగా వృద్ది చెందే ప్రమాదం ఉన్నందున ఈ సీజన్లో తగు జాగ్రత్తలు పాటించటం ఎంతైనా అవసరం అవి..

• కూరగాయలు, ఆకుకూరలు, పండ్లు బాగా కడిగి వండుకోవాలిపచ్చివి తినకపోవటమే మేలు.
• ఓవర్ హెడ్ టాంకులు, నీళ్ళు నిల్వజేసుకునే సంపులు బ్లీచింగ్‌ పౌడర్‌తో శుభ్ర పరుచుకోవాలి. అవసరాన్ని బట్టి నీటిలో పరిమితంగా బ్లీచింగ్ పౌడర్ కలుపుకోవాలి.
• ఫిల్టర్ లేదా కాచి వడబోసిన నీటిని మాత్రమే వాడాలి.
• ఇంటి పరిసరాలలో ఎక్కడా వాన నీరు నిలవకుండా చూసుకోవాలి. ఎండిన కొబ్బరి చిప్పలు, వాడి పారేసిన ప్లాస్టిక్‌ డబ్బాలు, డ్రమ్ములు , పాత టైర్లు వంటివి లేకుండా చూడాలి. లేకుంటే డెంగ్యూ, మలేరియా కారక దోమలు వృద్ధి అయ్యే ప్రమాదం ఉంటుంది.
• అప్పటికప్పుడు వండుకొన్న వేడివేడి ఆహారాన్ని మాత్రమే తినాలి. వృధా అవుతాయనే ఉద్దేశంతో మిగిలిపోయిన అన్నం, కూరలు మరునాడు తింటే సమస్య తప్పదు
• వంటపాత్రలు, నీళ్ళ బిందెల మీద ఈగలు, దోమలు వాలకుండా తప్పక మూతలు పెట్టాలి .
• వానలో తడిస్తే ఇంటికి చేరగానే పాదరక్షలు బయట విప్పి కాళ్లు శుభ్రంగా కడుక్కోవాలి. వేడినీటితోతలస్నానం చేసి పొడి తువ్వాలుతో తల, ఒళ్ళుశుభ్రంగా తుడుచుకొని పొడి దుస్తులు ధరించాలి. చంకలు, గజ్జల్లో తడి లేకుండా చూసుకోవాలి.
• ఇంట్లో చెప్పులు వేసుకుని తిరిగే అలవాటు మానుకోవాలి. ఇంట్లో తడి బట్టలు, తువాళ్ళు కుప్పలు కుప్పలుగా పెడితే ఫంగస్ ఏర్పడి చర్మరోగాలకు దారితీసే ముప్పు ఉంది.
• వంటగదిలో వాడే పాతబట్టలు, పాత్రలు కడిగే బ్రష్‌, సింక్, కుళాయిలు, గ్యాస్ స్టవ్ తదితరాల మీద క్రిములు చేరకుండా ఎప్పటికప్పుడు వేడినీటితో శుభ్రపరచాలి
• వాననీటిలో చెప్పులు లేకుండా తిరగకూడదు. ఒకవేళ తిరిగితే వేడినీటితో కాళ్ళు శుభ్రంగా కడుక్కొని తుడుచుకోవాలి. వేళ్ల మధ్య తడిలేకుండా చూసుకోవాలి లేకుంటే ఫంగస్‌ చేరి చర్మ సమస్య వచ్చే ముప్పు ఉంటుంది.
• ఈ సీజన్లో షూ కంటే చెప్పులు వాడటం మంచిది. దీనివల్ల పాదాల వద్ద చెమ్మ చేరదు సౌకర్యంగా కూడా ఉంటుంది. ఒకవేళ వానకు తడిసినా తొందరగా ఆరతాయి. షూ తప్పనిసరి అయితే వదులుగా ఉన్నవాటిని ఎంపిక చేసుకోవటం మంచిది.
• చెవిపోటు, చెవిలో స్రావాలు, చర్మం మీద దద్దుర్లు, మచ్చలు కనిపిస్తే వెంటనే వైద్యులను సంప్రదించాలి.